ورزش کرنا اور ڈائٹنگ کے باوجود اکثر لوگ یہ شکوہ کرتے نظر آتے ہیں کہ ان کے وزن میں کسی قسم کی کمی واقع نہیں ہو رہی ہے ایسے افراد کا اسکے بعد تمام کوششوں سے اعتبار اٹھ جاتا ہے اور ان کو یہ محسوس ہونے لگتا ہے کہ ان کا وزن کبھی بھی کم نہیں ہوگا مگر یہ ایک غلط نظریہ ہے
ورزش اور ڈائٹنگ کے باوجود وزن کم نہ ہونے کی وجوہات
ورزش اور ڈائٹنگ دو ایسے ذریعے ہیں جس کے ذریعے موٹے افراد اپنے وزن کو کم کر سکتے ہیں لیکن اگر باقاعدگی سے ورزش کرنے کے باوجود اور مکمل پرہیز اور ڈائٹنگ کے باوجود اگر وزن کم نہ ہو تو اس کی کچھ وجوہات یہ ہو سکتی ہیں
کھانا کھانے کےفورا بعد سو جانا
اکثر لوگ وزن کم کرنے کی جدوجہد میں اتنے مصروف ہوتے ہیں کہ باقاعدگی سے صبح سحر کے وقت ورزش کرتےہیں اس کے ساتھ ساتھ کھانے کی مقدار بھی کم کر دیتے ہین جس کی وجہ سے کمزوری محسوس کرتے ہیں
ایسے افراد جیسے ہی کھانا کھاتے ہیں ان پر سستی طاری ہو جاتی ہے اور وہ جہاں کھانا کھاتے ہیں وہیں پاؤں پسار کر لیٹ جاتے ہیں اور ان کا اس طرح سونا ان کی ساری محنت کو ضائع کر دیتا ہے
ماہرین کے مطابق کھانا کھانے کے بعد ایک ہزارقدم تک چلنا ضروری ہے اس کے ساتھ کھانا کھانےکے دو گھنٹے کے بعد تک نہیں سونا چاہیۓ ہے
ذہنی دباؤ کا شکار ہونا
ذہنی دباؤ کے سبب جسم میں موجود کارٹی سول نامی ہارمون کی شرح میں اضافہ ہو جاتا ہے اس کی وجہ سے کھایا گيا کھانا جسم میں چربی کی صورت میں جمع ہونا شروع ہو جاتا ہے اور پرانی چربی کے پگھلنے کا عمل بھی رک جاتا ہے یہی وجہ ہے کہ اگر آپ ذہنی دباؤ کا شکار ہیں تو اس صورت میں ورزش اور ڈائٹنگ کے باوجود موٹاپے میں کسی بھی قسم کی کمی واقع نہیں ہو گی
جنس
عام طور پر یہ نوٹ کیا گیا ہے کہ عورتوں کا وزن مردوں کے مقابلے میں دیر سے کم ہوتا ہے اس کی بہت ساری وجوہات میں سے ایک وجہ جسم کی بناوٹ بھی ہے ۔ خاص طور پر عورتوں کے پیٹ پر موجود چربی کو کم کرنا کافی مشکل ہوتا ہے اس وجہ سے اگر آپ کا تعلق صنف نازک سے ہے تو اس کے لیۓ تیار ہو جائیں کہ ورزش اور ڈائٹنگ کے باوجود آپ کا وزن دیر سے کم ہو گا
عمر کے اثرات
اگر آپ کی عمر تیس سال سے زیادہ ہے تو یاد رکھیں کہ آپ کے جسم کا میٹا بولزم سستی کا شکار ہو چکا ہے اس وجہ سےاس عمر میں وزن میں اضافہ تو تیزی سے ہو سکتا ہے لیکن وزن کم کرنے کے لیۓ آپ کو عام حالات سے زیادہ محنت کرنی پڑ سکتی ہے
ماہرین کے مطابق عمر میں ہر دس سال اضافے کی صورت میں دو فی صد سے 10 فی صد تک میٹابولزم میں کمی واقع ہوتی ہے
بالکل کم کھانا
وزن کم کرنے کے لیۓ کھانا پینا چھوڑ دینا اور صرف ایک وقت کھانا کھانا جسم میں کمزوری کی سبب ہوتا ہے اس وجہ سے وزن کے کم ہونے کا عمل سست روی کا شکار ہو جاتا ہے اور وزن کم ہونے کے بجاۓ بڑھنے لگتا ہے
یہی وجہ ہے کہ وزن کم کرنے کو خواہشمند افراد کے لیۓ یہ ضروری ہے کہ وہ کسی بھی ماہر غذائیت کی رہنمائی میں وزن کم کرنے کے لیۓ ڈائٹ اور ورزش کا انتخاب کریں ۔ تاکہ وزن مناسب انداز میں کم ہو سکے
تھائی رائڈ گلینڈ میں خرابی
تھائی رائڈ گلینڈ کی خرابی کی صورت میں جسم پر مختلف قسم کے اثرات مرتب ہو سکتے ہیں ۔ جن میں سے ایک خرابی ہائپو تھائی رائڈازم نامی بیماری بھی ہوتی ہے جس کے نتیجے میں بیمار شخص کے وزن میں تیزی سے اضافہ ہوتا ہے ۔
چونکہ یہ موٹاپا کھانے پینے اور سستی کے سبب نہیں ہوتا ہے اس وجہ سے اس موٹاپے کو کم کرنے کے لیۓڈائٹنگ اور ورزش کامیاب ثابت نہیں ہوتی ہے اس وجہ سے ایسے مریضوں کو کسی اینڈوکرائن ماہر ڈاکٹر سے رجوع کرنا چاہیے
جو کہ تھائی رائڈ کے علاج کے لیۓ باقاعدہ جانچ کر کے اس کے علاج کو تجویز کرۓ گا جس کے علاج کے بعد ہی وزن کم ہو سکےگا
وراثتی خصوصیات
بعض افراد کو موٹاپا ان کے والدین کی جانب سے ورثے میں ملتا ہے ایسے افراد کے ماں باپ یا ان میں سے کوئی ایک موٹاپے کا شکار ہوتا ہے اس وجہ سے جینز میں موٹاپا ہونے کے سبب وہ بھی موٹاپے کا شکار ہو سکتے ہیں
ایسے افراد کا بھی ورزش اور ڈائٹنگ کرنے کے نتیجے میں فوری طور پر وزن کم نہیں ہوتا ہے لیکن ایسے افراد کو چاہیے کہ حوصلہ نہ ہاریں اور کوشش جاری رکھیں ۔ مستقل محنت اور کوشش کےنتیجے میں وہ وزن کم کرنے میں کامیاب ہو جائیں گے
یاد رکھیں
وزن کم کرنے کے لیۓ کسی بھی ڈائٹ پلان کو فالو کرنے سے پہلے اپنے ماہر غذائیت سے ضرور مشورہ کریں جو آپ کے جسم کی ساخت ، عمر اور وزن کو دیکھتے ہوۓ ڈائٹ اور ورزش تجویز کرۓ گا